วัดหนองม่วง

ทำวัตรจบแล้ว ทำสั้นๆ เพื่อเป็นวิธี เมื่อทำวัตรเย็นจบแล้ว ก็ต้องมาเล่า หรือมาเล่าเรื่องวิธีปฏิบัติให้พวกเราฟังอีก ตอนเช้านี้ก็เล่ามาให้ฟัง ว่าวิธีปฏิบัติ ผลมันเป็นอย่างซั่น ตอนเย็นมื้อนี้ก็ต้องเล่าให้ฟังอีก ตั้งใจฟังกัน ฟังแล้วจดจำได้ นำไปปฏิบัติให้ถูกต้อง ถ้าฟังแล้วจดจำบ่ได้ ไปปฏิบัติก็บ่ถูกต้อง..บางทีนะ บางทีก็ถูกต้อง

ถ้าหากว่าเราบ่เข้าใจแล้ว การปฏิบัติมันบ่ค่อยได้รับผลดี ดังนั้นการปฏิบัติธรรมะวิธีที่เราทำกันอยู่เดี๋ยวนี้นี่ เรียกว่าวิธีสร้างจังหวะ เดินจงกรม บ่ให้นั่งนิ่งๆ ถ้านั่งนิ่งๆ แล้ว มันเป็นความสงบสมถ-กรรมฐาน สมถกรรมฐานนั้นเพิ่นว่าเป็นความสงบจิตสงบใจซือๆ นี้เพิ่นว่าอย่างซั่น

วิปัสสนากรรมฐานนั้นเป็นอุบายให้เกิดปัญญา เพิ่นว่า ดังนั้นเฮาเคยได้ยินครูบาอาจารย์เล่าให้ฟังว่า คนจะล่วงทุกข์ไปได้เพราะปัญญา เพิ่นว่าอย่างซั่น บ่แม่นคนจะล่วงทุกข์ไปได้เพราะนั่งสงบ เพิ่นบ่ว่าอย่างซั่นเด๊ะ ครูบาอาจารย์เพิ่นเล่าให้ฟัง ดังนั้น ต้องฟัง แล้วต้องเข้าใจ

การเคลื่อนไหวของเฮานี่ มันเคลื่อนไหวอยู่ตลอดเวลา ทำเพื่อหยัง ?-ว่าซั่น ทำเพื่อความรู้สึกตัว รู้สึกตัว..ตื่นตัว รู้สึกใจ..ตื่นใจ บ่ให้มีความเศร้าหมอง บ่ให้มีความซึมเซา บ่ให้โงกง่วง บ่ให้มีใจหดหู้ หลวงพ่อว่าหดหู้ ทางพี้ว่าใจหดหู่ ถามขเจ้าว่าหดหู่-ว่าซั่น หลวงพ่อว่าภาษาบ้านหลวงพ่อว่าใจหดหู้-ว่าซั่น ถ้าจิตใจเศร้าหมอง จิตใจโงกง่วง จิตใจหดหู้ จิตใจซึมเซา เพิ่นว่าบ่มีกำลังใจ กำลังสติปัญญาก็บ่มี เพิ่นว่าอย่างซั่น

ดังนั้น คนเราเป็นทุกข์เพราะว่าเราบ่รู้จักนั่นเอง ดังนั้นมาเจริญวิปัสสนา เอิ้นว่าวิปัสสนาก็ได้ หรือว่ามาเฮ็ดซื่อๆ ก็ได้ จิว่าจังใด๋ก็ได้ มันเป็นเรื่องสมมุติ เพื่อบ่ให้มันสงบนั่นเด๊อันนี่ อันความสงบแบบหนึ่งนั้นสงบแบบน้ำแข็ง สงบแบบนี้บ่แม่นสงบแบบน้ำแข็ง แล้วหมู่ไทยเฮาคงจิเคยได้เห็นน้ำแข็ง เคยได้เห็นน้ำแข็งบ่ครับ เคยได้เห็นน้ำแข็งบ่ ? ( ผู้ฟังตอบ ฟังไม่ชัด ) เออ…เห็นก็ว่าเห็นแม๊… ครั้นมันบ่ได้เห็น มันก็บ่ฮู้จักคำพูด น้ำแข็งนี้เป็นก้อนใหญ่ๆ บัดนี่ เอาไปวางไว้ตากแดดตากลม บ่อยู่ได้ทนเท่าใดแล้ว ละลายเป็นน้ำเมิ้ด-น้ำแข็ง

บัดนี่ น้ำแข็งนี่กินเข้าไปมันเย็นบัดนี่ เย็นจิ๊ว..ขึ้นไปในท้องในไส้เฮาพู่น บึดเดียวน้ำแข็งนั้นมันเหมิด เหมิดที่เย็นมันละลายออกมาเป็นเหื่อ(เหงื่อ) เหนียวตนเหนียวตัว หลวงพ่อคำนวณอย่างซี่ซือๆ หลวงพ่อบ่ได้เฮียนหนังสือหลาย บ่ได้มีความรู้หลาย หลวงพ่อคำนวณเอาเป็นปัจจุบันตัวเองนี่

ดังนั้น มาว่าให้หมู่ฟังกันน้ำแข็งที่เป็นก้อนใหญ่ๆ นั้นเอาไปตากแดด ตากลม บ่กุ้มพอมื้อดอก(ไม่ถึงวัน) ละลายเป็นน้ำตามเดิม บ่เย็นตลอดมื้อ บัดนี้เฮาลงน้ำลึกๆ บัดเนี่ยะ ลงน้ำของก็ซ่าง บ้านหลวงพ่อมีน้ำของ น้ำโขงว่าซั่น เพิ่นว่า แต่บ้านหลวงพ่อเอิ้นน้ำของ น้ำห้วย น้ำของว่าซั่น ลงลึกๆ ลึกไปเท่าใดยิ่งเย็นเท่าฮั้น น้ำอันนั้น ครั้นอยู่มอๆ ตาฝั่งนี้-อุ่น ลงไปลึกก็เย็น ลงไป ดำลงไปลึกแล้วยิ่งเย็น อันนี้ก็คือกัน ที่ญาพ่อว่าอยู่นี่ ถ้าเฮาเคลื่อนไหวมากๆ เนี่ยะ บางทีคนมาว่า เฮาจิบ่ได้ยินซ้ำพู่นเด๊ะ มันเสไป แต่ได้ยิน มันจิบ่ไปรับอารมณ์อันนั้น เพราะเฮาเห็นความคิดเฮาอยู่นี่ การเคลื่อนการไหวเนี่ยะ จึงว่าเคลื่อนไหวภายนอกซะก่อน อย่าสุนั่งนิ่งๆ

ถ้าหากผู้ใดนั่งนิ่งๆ ไปติดความสงบแบบน้ำแข็ง บ่แม่นแบบน้ำลึก คนอยู่ในถ้ำ มันมืด ญาพ่อเปรียบเทียบให้ฟัง เฮาจุดไฟขึ้น ความมืดหายไป แต่ความมืดมันบ่หายจากเฮาเด๊ะ เฮาอยู่นำความมืดฮั่นเด๊ะ เอาไฟมาเบิ่งทางหน้า ที่มืดมันมาข้างหลังพู่น เอาไฟมาข้างหลัง มืดมาข้างหน้า เอาไฟไปข้างซ้าย มืดไปข้างขวา เอาไฟไปข้างขวา มืดมาข้างซ้าย เพราะเฮายังอยู่ที่มืดฮั่นเด๊ะ

อันสมถกรรมฐานก็คือกัน บ่มีความสว่างในใจญาพ่อ ผู้อื่นเฮ็ดจิเป็นจังใด-บ่ฮู้จั๊ก บัดมาเฮ็ดการเคลื่อนไหวนี่ มีความสว่างในใจขึ้น เบาอกเบาใจขึ้น เป็นอย่างซั่น ผิดกันแท้ๆ จึงว่า ทิฏฐิความเห็นนั้น ผู้ใดจิมาว่าให้ บ่เชื่อ..ญาพ่อ ญาพ่อยังเปรียบเทียบให้ฟังว่า ตำหนิแผลที่ลี้ลับของเฮาแล้ว คนอื่นบ่มองเห็น ตำหนิแผลผู้อื่นเฮาจิไปมองเห็นจังใด๋ เพิ่นก็เห็นของเพิ่น เฮาก็เห็นของเฮาซั่นวะ อันตำหนิแผล บาดแผลตามเนื้อตามหนังเฮานี้เห็นได้ด้วยตา

อันใจเฮาคิดดีคิดชั่ว บ่คิดดีบ่คิดชั่วนะ เฮาบ่เห็นจั๊กเทื่อ บ่เคยว่าหามันจั๊กเทื่อ-จิตใจ แต่บางคนญาพ่อได้ยิน ญาพ่อก็เคยว่าซ้ำเด๊ะ-บางที อู๊.....ใจฮ้ายแท้ๆ ว่าซั่น แต่บ่ได้ว่าอารมณ์ คนกรุงเทพเพิ่นว่าอารมณ์บ่ดี อารมณ์มื้อนี่ อารมณ์ฉุนเฉียวเพิ่นว่า อารมณ์ขุ่นมัว - ว่าซั่น อารมณ์เศร้าหมอง เพิ่นว่าอย่าง

ซั่น บ้านญาพ่อบ่ว่าอย่างซี่ อู๊...ใจฮ้ายแท้ๆ มื้อนี่-ว่าซั่น อย่ามายุ่งนะ แน่ะ! ว่าเป็น ญาพ่อก็เคยได้ยินผู้อื่นก็ว่า ญาพ่อก็ว่า อ้ายน้องมาหา โอ๊ย...อย่ามายุ่ง ใจฮ้ายแน่ะ! ว่าไป บางทีลูกเมียไปหา ก็เว้ากัน โอ๊ย..อย่ามายุ่ง..ใจฮ้าย แน่ะ..ว่าไป

ครั้นฮู้จักว่าใจฮ้าย ก็เอาทิ้งปุ๊..ลงเสียแล้ว มันก็แล้วซื่อๆ นี่นะ มันเว้าเป็นซื่อๆ จังว่า ลักษณะคนเว้าเป็นเนี่ยะ บ่แม่นเด๊ะ การพูดจักร้อยคำพันคำหมื่นคำแสนคำล้านคำก็ตาม สู้การยกมือเทื่อเดียวนึงบ่ได้ การกระทำนี้มันทำให้เรารู้สึกซาบซึ้งตรึงใจแท้ๆ นี่เด๊ ญาพ่อเป็นอย่างซั่น จึงว่า หลวงพ่อก็เลยหาเอาวิธีที่มันบ่มีในตำรับตำราด๊อก คนบ่ได้อ่านหนังสือคัก มันก็บ่มีล่ะ ครั้นถ้าคนอ่านหนังสือคักๆ แล้วมีโลดตำรา มีบ่อนใด ? ว่าซั่น โย้…เฮาเคลื่อนเฮาไหวนี่ พระพุทธเจ้าบอกว่าให้มีสติกำหนดรู้เด๊ะ ในอิริยาบถทั้งสี่ ยืน เดิน นั่ง นอน คู้ เหยียด เคลื่อนไหวเนะเพิ่นบอก

อันเฮาเฮ็ดนี้ก็แม่น การคู้ เหยียด เคลื่อนไหวนั่นเด๊ะ บ่เเม่นอื่นไกลเด๊ะ ครั้นบ่เฮ็ดอย่างซี่ ให้คนมันบ่ฮู้จักวิธีเฮ็ด มันนั่งนิ่งๆ เน่ะ บางคนว่า เอา...เบิ่งลมหายใจก็ได้บ่ ได๊...จิบ่ได้จังใด๋ แต่ว่ามีดน้อยๆ สมมุติเอา ฟันไม้ใหญ่ๆ นี่มันบ่ขาดเด๊ะ ลองเบิ่งแมะ ครั้นมีมีดน้อยๆ คมดีมีดนั่นน่ะ ไปฟันไม้ใหญ่ๆ นี่ โอย..บ่ขาด มันซอยเอาทีละน้อยนี่ บึดเดียวมีดก็หักซ้ำ เป็นอย่างซั่น

บัดนี้ เฮ็ดวิธีญาพ่อว่านี่ พร้าอีโต้บักใหญ่ๆ… ทางพี่เอิ้นว่า พร้าอีโต้เอิ้นว่าใดฮึ พร้าใหญ่ๆ นี่ (ผู้ฟังตอบ - มีดโต้ครับ) มีดโต้ ทางบ้านหลวงพ่อเรียกว่าเอิ้น พร้าอีโต้ ว่าซั่น บ่ได้เอิ้นมีดโต้ พร้าใหญ่ๆ เนี่ยะ ขวานใหญ่ๆ เนี่ยะ ซัดใส่คม…หนาแล้ว ฟาดตู๊มเข้าไป มันเน่าในพู่นว่ะ มันบ่ขาด มันก็เน่าเปื่อยออกมาทีเล็กทีน้อย หักโลดบัดเดียว-ไม้

เรื่องโทสะ โมหะ โลภะนี้ก็ ว่าแต่เฮารู้เข้าบ่อยๆ แล้ว มึ้ง…ซันวะ…แต่แล่นไปปู๊น....กุ้นไปโลดบัดนี่ ครั้นเฮาเห็น มันเป็นอย่างซั่น นี่จึงว่า ความสงบมันจิมีอยู่สองอย่าง สงบแบบน้ำลึก เรียกว่าสงบวิปัสสนากรรมฐาน สงบแบบน้ำแข็งนั้น เรียกว่าเป็นสมถกรรมฐาน

ดังนั้น สมถกรรมฐานจึงเป็นอุบายให้สงบจิตสงบใจซื่อๆ วิปัสสนานั้นเป็นรถแทรคเตอร์ ไถฮากไถโคนมันออกไปโลดบัดเดียว เพิ่นว่า รากมันอยู่ไส ไถออกไปหลายเทื่อ ฮากเล็กฮากน้อยขาดเมิ้ด ต้นไม้ใหญ่มัน…ต้นไม้ใหญ่ๆ เนี่ยะ เฮาเบิ่งรถแทรคเตอร์ขเจ้าเฮ็ดทางเนี่ยะ ญาพ่อไปเบิ่งเนี่ยะ เอา...เอายกก้นอย่างซี่แล้ว ไถไปมันเนิ้งไปแล้วไถทางก้นพี่โลด ยู้ไป ไถ-บ้านหลวงพ่อเรียก ว่าจังใด๋ทางพี่ ว่าจังใด๋ฮึ ซุกไปนี่ว่าจังใด๋ฮึ ไถไปนี่ (ผู้ฟังตอบ - ดันไปครับ) ดันไป เอ้อ...แน่ะ! มันบ่ฮู้จักความหมายผิดกันเด๊ะ คนไทยแท้ๆ แหละเนี่ยะ เว้าเนี่ยะ บ่คือกัน ดันไปว่าซั่นทางเนี่ยะ ญาพ่อบ่ว่า ว่าแต่ไถไปว่าซั่น ยู้ไปว่าซั่น นี่เขาว่า ดันไปเนี่ยะมันผิดกัน

ดังนั้น อันมาเฮ็ดเดี๋ยวนี้นี่ เอิ้นว่าเฮ็ดวิปัสสนา เฮ็ดกับทำ อันเดียวกันเด๊ะ ทำ, เฮ็ด ว่าซั่น ทำกับเฮ็ดก็อันเดียวกัน-บ้านหลวงพ่อ ทางพี่จิว่า..บ่ว่าเฮ็ด ว่าซั่น ถามแล้วว่าทำ-ว่าซั่น ว่าสร้าง-ว่าซั่นเพิ่นว่า จังว่าให้เข้าใจ พริบตาก็ฮู้เมื่อ อันเฮาเฮ็ดจังหวะนี่มันใหญ่ ยกมือไปมือมา อยู่ไกลๆ จักสิบวา ยี่สิบวา มองไกลหรือจักสามสิบวาก็มองเห็นนี่เด๊ เฮาย่างไปเนี่ยะ เห็นยกมือไปมือมา อันนี้มันใหญ่

ให้เฮาฮู้จักว่า ให้ฮู้จักส่วนใหญ่นี่ก่อน บัดนี้ พริบตาบัดนี่ สิบวายี่สิบวามองบ่เห็นครั้นตาบ่ดี เข้าไปในระยะจักห้าวา จิมองเห็นบัดนี่ แน่ะ! มันละเอียดเข้าไปอย่างซั่นบัดนี่ ส่วนหายใจบัดเนี่ยะ ห้าวานี่จิมองบ่เห็น เข้ามาจักวาสองวา จิมองเห็นหายใจ ท้องมันติงวูบวาบๆ เห็นแล้วบัดนี่

ส่วนคิดนี่ เห็นบ๊อ ? บ่เห็นแล้วบัดนี่ ตัวเฮามองก็บ่เห็นเด๊ะ ผู้อื่นมองมันจิเห็นจังใด๋ นี่..จึงว่า คนอื่นจิมาฮู้ก่อนเฮาบ่ได้ เฮาต้องฮู้ก่อนหมู่ เพราะเฮาคิดอันใดเฮาต้องฮู้ เฮ็ดอันนี้ มันจิฮู้จักความคิดพู่นเนะ มันจิไปทำลายความคิดพู่นเนะ บ่แม่นทำลายตายเด๊ะ บ่แม่นอย่างซั่นเด๊ะ ทำลายจิบ่ให้โทสะ-โมหะ-โลภะเกิดขึ้นพู่น ทุกข์เพราะโทสะ-โมหะ-โลภะ บ่แม่นทุกข์เพราะโทสะ-โมหะ-โลภะก็ได้ ครั้นจิว่าเป็นสองศัพท์กลับกันเพิ่นว่า ทุกข์เพราะโทสะ-โมหะ-โลภะ อยู่ไส?-ว่าซั่น มีบ๊อเดี๋ยวนี้...บ่มี

แล้วหมู่แม่ออกเคยโกรธเป็นบ๊อ (เสียงผู้ฟังตอบได้ยินไม่ถนัด) โกรธเป็น…ว่า เดี๋ยวนี้โกรธบ๊อ..เดี๋ยวนี้นี่ฮึ (ผู้ฟังตอบ-ไม่โกรธ) แน่ะ! เฮาโกรธจึงบ่มี ในตัวเฮานี่ หมู่หลวงพ่อโกรธเป็นบ๊อ (ผู้ฟังตอบ-โกรธเป็นครับ) เดี๋ยวนี้โกรธบ๊อ..เดี๋ยวนี้นี่ (ผู้ฟังตอบ-ไม่โกรธครับ) แน่ะ! ความโกรธจึงบ่มีในเฮา อันเฮาโกรธมื้อใดนั้น เฮาหลงตนลืมโต หลงกายลืมใจ หลงชีวิต หลงจิตหลงใจเฮานี่ซื่อๆ นี่เนะ มีผู้ใดมาว่า มันหลงแล้วปุ๊ดไปเบิ่งเเต่ขเจ้าพู่น มันเกิดปรุงแต่งขึ้นแมะ

จึงว่าวิธีง่ายๆ อึ๊ดใจเดียวก็ได้โลด คนมีปัญญาฟังแล้ว ญาพ่อเว้าเนี่ยะ แต่ว่าหากจิบ่ฮู้จักภาษาเท่านั้นล่ะ ความจริงแล้ว ถ้าหากเฮาบ่หลงตนลืมตัว บ่หลงกายลืมใจ บ่หลงชีวิตเฮาจั๊กเทื่อ ไปไสมาไสเบิ่งชีวิตนั่นน่ะ ไปไสมาไสว่าซั่นบ้านหลวงพ่อ ทางนี้อาจจะว่าไปไหนมาไหน อาจจะว่าอย่างซั่นก็ได้นะ มันบ่ฮู้จัก จึงว่าไปไหนมาไหน บ้านหลวงพ่อครั้นว่าไปไหนมาไหนนี่ ว่าไทยญวนว่าซั่น ทางโพ้นทางเมืองแพร่เมืองน่านพู่น เอิ้นไปไหนมาไหนนี่ บ้านหลวงพ่อเอิ้นไปไสมาไสว่าซั่น แต่หากพอฟังกันได้ เป็นอย่างซั่น

ดังนั้น ความสงบจึงมีอยู่สองอย่าง สงบสมถะกรรมฐานนั้น บ่ฮู้จักพวกกาม บ่ฮู้จัก-ญาพ่อ ญาพ่อทำมา แต่ศีลนี่ญาพ่อก็บ่ฮู้จัก เรื่องโทสะ โมหะ โลภะก็บ่ฮู้จัก บ่ฮู้จักแท้ๆ -ญาพ่อ ผู้อื่นที่จิฮู้จักบ่ฮู้จัก ก็บ่..บ่ฮู้จั๊ก-ญาพ่อ เพิ่นฮู้จักน้อย เพิ่นฮู้จักหลายแท้บ่ฮู้จัก

ญาพ่อฮู้จักแต่ตัวญาพ่อเอง ญาพ่อนี่ทำบุญอยู่ครั้งนึง เฮ็ดกองกฐินนะอันเนี่ยะ บ่ใช่ว่าทำบุญนั้นเด๊ะ ทำบุญกองกฐินแท้ๆ นี่นะ หมอลำ-จ้างหมอลำมาลำ แล้วก็จ้างหนังไป ได้เว้ากันแล้วกับแม่ออกเเม่เทียนนี่ว่า หน้าที่ของเจ้าเป็นผู้รับแขก แต่งพาข้าวพาน้ำให้กิน แล้วก็เงินทองให้เจ้าเป็นคนจ่ายว่าซั่น ญาพ่อว่า ข้อยเป็นหน้าที่รับแขกต่างบ้านทางไกล รับศีลแปด-ญาพ่อ แม่ออกเเม่เทียนนี่ให้เรารับศีลห้าว่าซั่น-แน่ะ! มันเอาเปรียบเขานี่ บ่ถูกเรื่อง เป็นอย่างซั่น

บัดนี้หมอลำลำแล้วมื้อเซ้าขเจ้าก็ถามเอาเงินตี๊ จิให้เท่าใดว่าซั่น ความจริงว่ากันแล้ว ปื๊บ......โลด ญาพ่อหนักโอนโต้นอยู่ในใจ แต่มันยิ้มได้เพราะคนหลายเด๊ะอยู่ในเฮือนฮั่น ยิ้มอยู่แต่มันหากบ่ยิ้มได้ว่าใจพู่นน่ะหนักอยู่พอปานเอาโซ่ซ้าง(ช้าง)อ้อมคออยู่พู่นน่ะ ลุกบ่ขึ้นพู่นน่ะ “จิให้เท่าใดก็ให้ไปโลด”เราก็บ่ฮู้จักว่าญาพ่อเป็นหยังเว้าดีๆอยู่

เอากฐินไปทอดให้พระ มาแล้วก็มื้อแลงก็มากินข้าวสองคน สี่กับลูก ลูกสองคน ยังน้อย แล้วก็พ่อแม่ให้ว่าเถอะไป คราวนั้นเป็นพ่อคนแม่คนแล้วเด๊ะ-ญาพ่อ บัดนี้ก็เลย..เว้าอยู่ฮั่นแหละ เว้าเรื่องอยากให้เขาฮู้จักนั่นน่ะ เขาก็ฮู้จักแล้ว เขาหากบ่อยากเว้า- มันบ่ดี บัดนี้เขาก็เลยถาม

โธ..โธ ..โธ้..แม่นความเราแท้ๆ ญาพ่อเชื่อฟังโลด! ผู้ใดเว้า ครั้นมันถูกจังหวะ ญาพ่อยังพอฟัง เชื่อทันทีโลดบัดเดียว-ญาพ่อ อ้อ....เเม่นความเจ้าแล้วบัดเนี่ยะว่า นึกในใจว่า อ๊อ...เเม่นเเล้ว แม่นความเขาแล้ว เราตกนรกผู้เดียวเราเด๊นี่ ยังว่า นรกที่ใต้ดิน ญาพ่อบ่ไปเทื้อ-ญาพ่อ ญาพ่อตกนรกเดี๋ยวนี่นะ แก้เดี๋ยวนี้นี่นะก่อนน่ะ ญาพ่อว่ามื้อเซ้านี่ว่า ผู้ใดจิไปตกนรก จ่ายมบาลจดใส่หนังหมาเน่าไป ผู้ใดจิไปสวรรค์นั้น เทวดาจดใส่กระดาษทองคำไปว่าซั่น หนังหมาเน่านี่มันเหม็นอยู่ในใจพู่น เขาบ่เห็น แต่เจ้าของทุกข์อยู่ในใจพู่น ญาพ่อตั้งแต่มื้อนั้นมา รู้สึกเอาละ บัดนี่ว่าซั่น “ถ้าหากเอาชนะสิ่งนี้บ่ได้แล้ว บ่แล้วกันเรื่องชีวิตนี้”– ว่าซั่น ญาพ่อตั้งใจไว้แต่พู่นล่ะ หมู่เพิ่นไปปฏิบัติธรรมะ เพิ่นจิตั้งใจปฏิบัติอย่างใด บ่ฮู้จัก-ญาพ่อ

ญาพ่อมีความตั้งใจอย่างซี่มาตั้งแต่มื้อนั้นล่ะมา เฮ็ดกองกฐินก็แล้ว ทำบุญให้ทาน เฮ็ดมาอยู่ซั่น แต่มันบ่เซาความโกรธนี่ รักษาศีลแปด หลวงพ่อก็รักษาแล้ว มันบ่เซาใจฮ้ายนี่นะ มันบ่เซาความโกรธ มันบ่เซาความหลงนี่นะ นี่! บัดมาเฮ็ดอันนี้แล้วมันสามารถที่จะเซาได้นี่ จิตใจมันก็บ่หงุดหงิดปานใดนี่นะ ไผสิว่าสัง...สังใดก็ตามซ่างนี่นะ เรื่องของขเจ้าบ่แม่นเรื่องของเราว่าซั่น ญาพ่อรู้จังซี่

จังว่า ญาพ่อทำกรรมฐานมา ญาพ่อบ่รู้- บ่รู้ บ่คิดถึงซ้ำ จำพวกกามนี่ก็ได้ กามาสวะ ภวาสวะ อวิชชาสวะ ญาพ่อบ่คิดถึงจั๊กเทื่อ ทำกรรมฐานมาตั้งแต่อายุสิบกว่าปีมา ไผสิว่าสังใดก็ตามซ่าง ว่าญาพ่อว่าอวดดี เว้าแต่เรื่องของตัวเอง ว่าเจ้าของเก่ง เอ้า..เก่งแม้...คนมีดีแล้วก็ต้องเอามาเว้า แต่บ่แม่นคนอวดดีเด๊ะเนี่ยะ คนมีดีแล้ว เอามาเว้าสู่ฟัง อันคนอวดดีนั้น อวดดีซื่อๆ ถามต้นชนปลายบ่ได้ จับกกจับปลายบ่ได้ ชี้โน้นชี้นี้นี่-บ่แม่น ญาพ่อเป็นอย่างซั่น

ญาพ่อปฏิบัติทีแรก ญาพ่อรู้เรื่องรูปนาม จบเรื่องรูปนามแล้วก็มา ญาพ่อก็มารู้เรื่องความคิด ทำลายเรื่องโทสะ-โมหะ-โลภะนี้ นี่พักนึง ทำลายโทสะ-โมหะ-โลภะแล้วก็ทำลายกิเลส ตัณหา อุปาทานนี้ กรรมนี้ออกไปโลด-ญาพ่อ เมื่อทำลายสิ่งเหล่านี้แล้ว แล้วก็เห็นโลด ศีลขันธ์ สมาธิขันธ์ ปัญญาขันธ์โลด บ่แม่นศีลขันธ์อันขันธ์ห้า ขันธ์แปด ขันธ์สิบสองพู่น บ่แม่นเด๊ะ ญาพ่อว่า รูปขันธ์นี่เด๊ะ - ญาพ่อว่า รูปอันนี้มีศีล รูปขันธ์มีศีลว่าซั่น เวทนาขันธ์มีศีล สัญญาขันธ์มีศีล สังขารขันธ์มีศีล วิญญาณขันธ์มีศีล จึงว่า ศีลตัวเดียวเท่านี้-ญาพ่อ

รูปอันนี้ก็อยู่หน้าที่รูปอันนี้แล้ว เวทนาเสวยอารมณ์ก็มีศีลแล้วเด๊ะบัดเนี่ยะ ก็จิไปเสวยมันเฮ็ดหยังความทุกข์อ่ะ ครั้นเจ้าของมีศีลน่ะ อันผู้ใดไปรักษาศีลอยู่ ยังไปเสวยความทุกข์อยู่ โอย....คล้ายๆ คือสัตว์นรกนั่นแล้ว อันนั้น เป็นอย่างซั่นเด๊ะ คือเทวดากับหนอน คุยกันนั่นแล้ว เป็นอย่างซั่น

เมื่อฮู้จักอันนี้แล้ว ญาพ่อก็ฮู้จักโลดบัดเดียว ฮู้จักศีลขันธ์ สมาธิขันธ์ ปัญญาขันธ์ อธิศีลสิกขา อธิจิตตสิกขา อธิปัญญาสิกขา ตำราว่าอย่างซั่น อันศีลขันธ์ สมาธิขันธ์ อย่างญาพ่อว่านี้ บ่มีตำรา ญาพ่อบ่เห็น บ่ได้ยินครูบาอาจารย์ว่าให้ฟัง อื้อม..ได้ยินแต่ว่าอธิศีลสิกขา อธิจิตตสิกขา อธิปัญญาสิกขา สิกขาสาม เพิ่นว่าอย่างซั่น แต่ญาพ่อไปเฮ็ดนั้น บ่แม่นว่าอย่างซั่น อธิศีลสิกขาว่าซั่น อธิจิตตะ..เอ้อ..อันศีลขันธ์ สมาธิขันธ์ ปัญญาขันธ์พี่ ฮู้จักอันนี้แล้ว ไปฮู้จักอันนั้นโลดบัดเดียว จังว่า บ่ต้องเรียนก็ได้ เมื่อปฏิบัติจริงๆ แล้ว รู้จริงๆ

เมื่อรู้อันนี้แล้ว โอ๊....สมถกรรมฐานนี้มันยังบ่รู้อันมาหมู่นี้ว่าซั่น มันยังบ่รู้ ก็ฮู้จักกามโลดบัดเดียว แต่นี่ตัวเองไปนั่งทำกรรมฐาน พุทโธ ธัมโม อรหัง พอง-ยุบ นั่งภาวนาดูลมหายใจเข้าออก-สั้นยาว-ลมหยาบลมละเอียด โอ๊ย....ญาพ่อเฮ็ดมาพอแล้ว ตัวแข็งทื่อ ญาพ่อเฮ็ดมา มันบ่ฮู้จักนี่นะ ยังว่า สงบแบบอยู่ในถ้ำ บ่แม่นมันสงบแบบออกจากนอกถ้ำ อยู่ในถ้ำ จุดไฟขึ้น-มืด ความมืดหายไปโลด แต่ไฟมันบ่ออก...เอ่อ...ความมืดมันบ่ออกจากเฮา เพราะเฮาอยู่ที่มืดเนะ

บัดนี้ เฮาบ่ต้องอยู่ที่มืดบัดนี่ บ่ต้องไต้ไฟก็ได้ ออกจากถ้ำมาแล้ว มาย่างอยู่ปากถ้ำนี่ มองเบิ่งในถ้ำบ่อนมันเห็นบัดนี่ มันมืดอันนั้นน่ะนี่ ออกมาทางนอกพี่ มองไปทางพี่ มันสว่างโลด มันเป็นอย่างซั่นเด๊ะ จิตใจเปลี่ยนเข้าไปเทื่อนึง สองเทื่อนี่เป็นอย่างซั่น

อวิชชา คือความบ่รู้ อวิชชาคือบ่รู้ภพ บ่รู้ชาติ บ่รู้แจ้ง ว่าอย่างซั่นก็ได้ จึงว่า อ้อ....บัดนี้ กามา-สวะ เราทำลายมันแล้วบัดเนี่ยะว่าซั่น ภวาสวะ เราทำลายภพชาติอันนี้ไปแล้วว่าซั่น อวิชชาสวะ เราทำลายอวิชชาอันนี้แล้ว เป็นวิปัสสนาแล้ว เข้าใจแท้ๆ มันเริ่มฮู้จักมาตั้งแต่เมื่อรูปนามพู่นนะ-ญาพ่อ ว่าวิปัสสนานี่ ฮู้จักโลด อ้อ...วิปัสสนามันมาอย่างซี่-ว่าซั่น

จนว่ามาฮู้จักวัตถุปรมัตถ์ นี่ก็รู้จักมากเข้า มากเข้า จึงว่า ยิ่งลงลึกเท่าใด ก็ยิ่งเย็นเท่านั้น ทำอิด(ทีแรก)ลงอยู่น้ำตาฝั่งนี้ซะก่อนอันรูป-นามนี่ ลงเข้าไปฮอดวัตถุปรมัตถ์นี่ก็ลงน้ำเพียงอกเพียงแอวนี่แล้วบัดนี่ ลงเข้าไปถึงศีลแล้วก็คล้ายๆ คือน้ำลึกแล้วก็ท่วมหัวเย็นจิ๊วเข้าไปแล้วบัดนี่ เข้าไปลึกๆ บัดนี่ เห็นตัวอวิชชา ตัวกามาสวะ ภวาสวะ อวิชชาสวะเนี้ยะ ยิ่งลึกบัดนี่ หยั่งบ่ถึงแล้วบัดนี่ มันเป็นอย่างซั่นนิ-มันเย็น ความเย็นมัน จึงว่า ความเย็นผิดกัน ลงลึกเท่าใด ยิ่งเย็นเท่าฮั้น หลวงพ่อว่า บ่แม่นเย็นแบบน้ำแข็งอันนี่

ในทางตรงกันข้ามบัดเนี่ยะ ทำบุญด้วยกายซือๆ นี่ มีแต่เอามือเฮ็ดซือๆ ใจบ่พร้อม คำปากบ่เว้าเทื่อ หากสวรรค์มีแล้ว จิไปอยู่สวรรค์ชั้นใดว่าซั่น บ่ต้องถามไผหมู่นี้ ฮู้จักโลด นานจักปีจักเดือนน่ะ นิพพานมี ไปอยู่นิพพานชั้นใดว่าซั่น ฮู้จักอย่างซั่น

บัดนี้ ทำบาปด้วย...เออ...ทำบุญด้วยใจบัดเนี่ยะ ใจคิดดี แต่มือบ่ทำ ปากบ่เว่า มีแต่ใจคิดดีซื่อๆ นี่ละ หากสวรรค์นิพพานมีแล้ว ตายไปแล้วไปเกิดสวรรค์ชั้นใด ไปอยู่ในสวรรค์ชั้นใด หรือนิพพานมี ไปอยู่นิพพานชั้นใด นานจักปีจักเดือน ฮู้จักอย่างซั่น

ฮู้จักแล้ว ปัดโธ่...ว่า...บัดใด อันมานั่งเฮ็ดจังหวะอยู่นี่ เดินจงกรมอยู่นี่ มันเริ่มมีศีลมีธรรมครบหมดเด๊ หนึ่ง กายนี่ก็บ่ได้ไปฆ่าสัตว์ บ่ไปลักทรัพย์ ศีลนี้จึงว่ารับก็ได้ บ่รับก็ได้ ญาพ่อว่าอย่างซั่น บัดนี้ คำพูดคำจาเฮาเนี่ยะ มีผู้ใดมาถามเฮาก็ว่าดีๆ บัดนี่ ใจเฮาก็คิดน้อมน้าวเข้ามาแต่ในตัวเฮา มันครบเมิ้ดบัดเดียว ก็เลยเห็น เลยรู้ เลยเข้าใจ สัมผัสแนบเเน่นอยู่อันนี้ เรียกว่า จิตใจสะอาด จิตใจสว่าง จิตใจสงบ จิตใจบริสุทธิ์นั้น ผ่องแผ้วว่องไวนั้น เพิ่นว่า จิตใจของพระพุทธเจ้าว่าซั่น เฮาก็ต้องตริตรองให้มันได้พระพุทธเจ้ามาไว้ม่อๆ เฮานี้แม่นบ๊อมันจิถูก

ถ้าหากว่า เฮานั่งอยู่เดี๋ยวนี้นี่ ญาติโยมคือกัน ครูบาอาจารย์คือกันทุกองค์นี่ จิตใจก็สบายอยู่ซีอๆ นี่น่ะ อันนี้ลักษณะจิตใจสงบซือๆ เด๊นี่ สงบอยู่อย่างซี่ เพราะว่าเฮาฟังอยู่เด๊ะ เฮาบ่ได้เห็น แต่มันก็มีอยู่นี่ แต่หากเฮาบ่เคยเห็นจักเทื่อ บ่เคยฮู้จักว่าจิตใจสงบ เป็นลักษณะอย่างนี้น้อ เฮาบ่ฮู้จักซักเทือ โอ๊....จิตใจสงบนี้ คือกันกับจิตใจพระพุทธเจ้านั่นเด๊เนี่ยะ ครั้นเฮาคิดอย่างซี่แล้วก็ โอ๊...จิตใจสงบนี้แม่นจิตใจพระพุทธเจ้าเด๊ โอ๊...เราก็มีพระพุทธเจ้าน้อยๆ เกิดขึ้นแล้วเด๊เนี่ยะ เฮาก็ฮู้จักโลดซั่นว้า - เฮามีอ่ะ

เฮามีเงินบาทหนึ่งอยู่ในถุงเสื้อเฮาเนี่ย มีคนมาถาม เฮาก็จิฮู้จักละว่ามีเงินเท่าใด๋ เจ้าว่ะ มีบาทนึง เงินเป็นเหรียญละบาท หรือเป็นใบละบาท เฮาก็ฮู้จักซั่นวะ ถ้าเฮามีใบละห้าบาทอยู่ในถุงเสื้อเฮาเนี่ยะ มีคนมาถาม เจ้ามีเงินบ๊อ?- มี มีเท่าใด? มีห้าบาท เป็นเหรียญห้าบาทบ๊อ หรือเป็นธนบัตรใบละห้าบาท? เฮาก็ฮู้จักซั่นละว้า เงินเฮามี

บัดนี้ เฮามีเงินใบสิบบาทบัดเนี่ยะ มีคนมาถาม เฮาก็ฮู้จักว่าใบสิบบาทโลดบัดเดียว นี่เดี๋ยวนี้มีใบ..ใบห้าสิบก็มีเด๊ะเดี๋ยวนี้ แต่ก่อนบ่ทันมี มีใบละยี่สิบบาทบัดเนี่ยะ เฮาก็บอกว่ามียี่สิบบาทโลดบัดเดียว เพราะเฮาเห็นเด๊ะ ใจมันเห็น อยู่ถุงเสื้อก็ตามซ่าง อยู่ไสก็ตาม เฮาจับไว้แล้ว มันเอาไว้เนี่ยๆ มันเห็น มีเงินยี่สิบบาท เฮาก็บอกว่ามีเงินยี่สิบบาท มีห้าสิบบาท เฮาก็บอกมีห้าสิบบาท แต่ก่อนมีแต่ใบละร้อย ใบห้าร้อยเด๊บ่มี – แต่ก่อน

บัดนี้ คนบ่มีเงินเด๊บัดเนี่ยะ เจ้ามีเงินบ๊อว่าซั่น? มี อยู่ไสๆ ? อยู่ธนาคารพู่น บ่มีเงินผู้ฮั่น อวดดีซื่อๆ นี้ บางทีบ่มีเงินในธนาคารก็ตามซ่างนี้เนี่ยะ บางคนบ่มีเด๊เงินธนาคารกันน่ะ ว่าซื่อๆ ว่าเจ้าของมีเงินน่ะ แน่ะ...อันนี้เฮามีเงิน..เงินธนาคารก็มีบัดนี่ อยู่ถุงเสื้อก็มีแท้ๆ นี่นะ จึงว่า คนอวดดีกับคนมีดีเอามาเว่า มันจึงต่างกัน ให้เข้าใจอย่างซั่น

บอกบ่ให้เชื่อแล้ว ต้องทดลอง ต้องปฏิบัติ ถามหมู่ญาติโยมนี่ก็คือกัน ถามพระเจ้าพระสงฆ์คือกัน ต้องปฏิบัติให้รู้จักตัวเรา ให้รู้จักรูป รู้จักนามนี่แหละ ทีแรกก็…เมื่อรู้จักอันนี้แล้วก็ฮู้จักเป็นขั้นเป็นตอนไป เพิ่นเอิ้นปฐมฌาน ทุติยฌาน ตติยฌาน จตุตถฌาน ปัญจมฌาน เพิ่นว่าอย่างซั่น เฮาบ่ว่าก็ได้ จิตใจเปลี่ยนครั้งที่หนึ่งเป็นหยัง? ว่าซั่น อื๊อ...มันฮู้จักรูป-นามนี่โลดบัดนี่

จิตใจเปลี่ยนเป็นขั้นเป็นตอนไป จนเท่ามีศีลอย่างสมบูรณ์อย่างญาพ่อว่านี่แหละ ก็เลยรู้จักจำพวกกาม กามาสวะ กามานี่ตกอยู่ในอำนาจของกาม คือ อารมณ์ยินดีรักใคร่พอใจในอารมณ์ เพิ่นเอิ้นกามาสวะ อาสวะคือกิเลส เพิ่นจึงว่าอย่าดีใจ อย่าเสียใจ เพิ่นว่าอย่างซั่น

บางคนก็ดูลมหายใจ เบิ่งจิตเบิ่งใจตัวเองดีว่ะ มันมีแล้ว ของมีแล้วทั้งนั้น ที่ญาพ่อเว้าอยู่นี่ บ่ใช่เพิ่นเว้าของบ่มีเด๊ ของมันมีเด๊ยังมาเว้าให้ฟังนี่ จึงว่า บ่ต้องศึกษาก็ได้ ถ้าหากปฏิบัติถึงที่สุดแล้วก็ต้องถึงจริงๆ

จังว่า สัญญาความหมายรู้จำได้ เพราะมันมี ถ้ามันบ่มี มันสิจำได้บ่ ? มันต้องเข้าใจอย่างซั่น ที่ญาพ่อเว้าให้ฟังนี่ บ่ยาก เรื่องนี้ เมื่อรู้จักอันนี้แล้ว ทำบุญด้วยกาย ด้วยวาจา ด้วยใจ ทั้งสามอย่างครบสมบูรณ์แล้วก็ วิ้ววว......โลดบัดเดียว มันขาดช่วงออกจากกัน ปุ๊ด...โลดบัดเดียวเน่ะ อันมันขาดออกจากกัน บ่แม่นจิว่าขาดอย่างซี่เด๊ะ มันเป็น...บ่เป็นพี่เป็นน้องกัน สมมุติเอาซือๆ เนี่ยะ บ้านหลวงพ่อ มีหิ้งสามขา ขเจ้าไปหาปู หาปลา หาเนื้อมา ขเจ้าเฮ็ดหิ้งสามขาไปย่าง ย่านมันเน่า เพิ่นว่าอย่างซั่น มีหิ้งสามขาซุกบ่ล้ม เอาออกขาหนึ่งแล้วยังสองขา ก็ยังนานล้มอยู่ เอ้อ...บัดนี้เอาออกทั้งสองขา..เอ้อ..ออก เอาออกขาเดียว ตั้งบ่อยู่แล้วบัดนี่ ลมพัดก็ล้มโลดบัดเดียว

อันนี้ก็คือกัน ถ้าหากทำลายโทสะ-โมหะ-โลภะออกไปแล้ว เพราะเฮาบ่หลง เพิ่นยังว่าอย่าหลงตัว อย่าลืมใจ อย่าหลงเนื้อหลงตัวเฮา เบิ่งการเคลื่อนการไหว มันนึกมันคิด อันนี้เป็นวิธีที่จะเข้าไปอันนั้น ถ้าหากบ่เบิ่งอันนี้ บ่มีวิธีจิเข้าไป - ญาพ่อ...ผู้อื่นเฮ็ดจิเป็นจังใด๋..บ่ฮู้จั๊ก วิธีที่จะเข้าไปหาความคิดได้คือ การเคลื่อนไหว เคลื่อนไหวรูปกายภายนอกนี้แหละเคลื่อนไหวเข้า เคลื่อนไหวเข้า บัดนี้จิตใจเคลื่อนไหวก็ต้องรู้บัดนี่ เน่ะ...มันเป็นอย่างซั่น

รู้จิตใจเคลื่อนไหวแล้ว เป็นจังใดเด่ะ ก็แปลว่ารู้แจ้งเห็นจริง แปลว่าได้ต้นทาง เพิ่นว่าเอิ้นได้กระแสพระนิพพานว่าซั่น นิพพานบ่ใช่เป็นตนเป็นตัวเด๊ะ อันว่าได้กระแสพระนิพพานก็ได้ความคิด มันคิดมันเห็น มันรู้นี่แหละ บัดนี้มันบ่โกรธนี่แหละ กระแสพระนิพพานน่ะ จึงว่าเข้าไปนิพพานให้มันได้ จึงว่าเฮาได้ใจสงบแล้วบัดนี่ ใจสะอาดเฮาต้องเห็นบัดนี่ ครั้นสะอาดก็แปลว่าเฮาเห็นนั่นแล้ว ครั้นว่าสะอาดแล้ว เบิ่งเป็นหยังก็เห็นอย่างซี่แล้ว โอ๊....ดีเนาะ นี่เฮาเบิ่งอย่างซี่ สะอาด เพิ่นเอิ้นใจสว่าง จิตใจสะอาด จิตใจสว่าง จิตใจสงบอันนั่น

มันสามารถที่จิมองเห็นอย่างซั่น เพิ่นว่าจิตใจสะอาด จิตใจสว่าง จิตใจสงบว่าซั่น จิตใจบริสุทธิ์ว่าซั่น สะอาดผ่องใสว่าซั่น จึงว่า คนเจริญวิปัสสนา มีสติ มีปัญญา ผ่องใส ตัดสินใจลงไป บ่พลาดเลย ทำการทำงานบ่พลาดผิด เพิ่นว่าอย่างซั่น เพราะมันฮู้จักเด๊ะ บ่แม่นตัดสินใจเพราะจิตใจเศร้าซึม จิตใจหดหู้จิตใจเศร้าหมอง จิตใจขุ่นมัว

กิเลสพันห้า ตัณหาร้อยแปดจิเข้าใจว่าอยู่นำตำราพู้น…บ่แม่น กิเลสพันห้า…เอ้า! เกิดขึ้นปัจจุบันนี่ห้าร้อยซะ เกิดขึ้นมื้อแต่ก่อนนั่นห้าร้อยซะ มื้ออื่นนี้อีกตื่มห้าร้อยซะ แน่ะ..สามห้าเป็นสิบห้าซั่นว่ะ หรือสามหก..เอ้อ..สามห้าสิบสองบ่ ฮั่นก็บ่ฮู้จักแล้ว..ญาพ่อบ่ฮู้จัก สามห้ามีเท่าใดฮึ? (ผู้ฟังตอบ-สามห้าสิบห้าครับ) สามห้าสิบห้า สิบห้าเป็นเท่าใดฮึ (ผู้ฟังตอบได้ยินไม่ชัด) อ้อ...สิบห้า เอาสามห้าสิบห้าเป็นเท่าใดฮึ (ผู้ฟังตอบ-เป็นพันห้าครับ) อ้อ..เป็นพันห้าเนาะ อ๋อ...กิเลสพันห้านี่ มันเกิดขึ้นนี่เด๊ะ บ่แม่นไปเกิดที่อื่นเด๊ะ จึงว่าเชื่อตำราให้เข้าใจ อดีต อนาคต ปัจจุบันนี่ มันอยู่นี่เลย เฮาลืมอดีต ลืมอนาคต ลืมปัจจุบัน มันก็ชกเอา ชกเอา ชกเอา

สมมุตินักมวยนะ ขึ้นในเวที เรียนจากครูมาดีแล้วบัดนี่ ไปแต่ไหว้ครูอยู่พู่น เขาชกเอา-แพ้เขาซะ นี่...บ่ได้เรื่อง เป็นแชมเปี้ยนบ่ได้ - ผู้ฮั่น ญาพ่อเว้าอยู่นี่ เรียนจากครูมาก็จริง แต่ว่าวิธีจิเป็นแชมเปี้ยนนั้น บ่ได้เป็นอย่างครูสอน เฮาขึ้นในเวที ในสนามบ่อยๆ ขึ้นไปในเวที ในสนาม ทีแรกอาจจิไหว้ครู เดี๋ยวนี้บ่ต้องไหว้ก็ได้บัดนี่ เฮาชกชำนาญแล้วเด๊ คู่ต่อสู้มาก็ยืนเฉย บ่ต้องไหว้ครูแล้ว เขาไหว้เขาก็ไหว้ไปซะ เบิ่ง คู่ต่อสู้หยับเข้ามามอๆ นี่ ชกใส่หลุมตาปึ๊บ....ใส่สองตาเลยบัดเดียว บ่เจ็บก็ตามซ่างเนะ คนตามันมืดปึ๊บ..โลดบัดเดียว มันมึนตาขึ้นมา ชกอีกตื่ม ลืมตาฮั่นอีกตื่ม สู้เฮาบ่ได้แล้วบัดนี่ มันจิตีแข้งตีขา เฮาจิเจ็บจังใด๋ เฮาชกหลุมตามันพู่นแล้ว

การเป็นแชมเปี้ยนโลกเป็นหยัง ? ก็เพราะว่าเป็นใหญ่ในรูปนี้ เป็นใหญ่ในจิต เป็นใหญ่ในชีวิต จึงว่า ตนเป็นที่พึ่งของตน - ว่าซั่นเพิ่นว่า พึ่งผู้อื่นบ่ได้แท้ๆ เฮ็ดให้บ่ได้แท้ๆ นี่..มันเป็นอย่างซั่น จึงว่า รู้จัก รู้แจ้ง รู้จริง สภาพภาวะที่บ่เกิดก็มีอยู่ในเฮานี่ จึงว่า นิพพานนั้นจึงว่าบ่เกิด บ่แก่ บ่เจ็บ บ่ตาย ญาพ่อจึงเข้าใจเรื่องนิพพานนี่ ไผจิว่าจังใด๋ก็ตามซ่างแล้ว ญาพ่อบ่เอานิพพานตายแล้วนี่ ญาพ่อบ่เอาแท้ๆ เอาเดี๋ยวนี้นี่แหละ ไปตกนรกก็บ่เอาเทื่อ นรกใต้ดินก็บ่เอาดอก เอาเดี๋ยวนี้นี่ก่อน แก้เดี๋ยวนี้

จึงว่า คน...ญาพ่อเคยเปรียบเทียบอย่างซี่ คนย่างไปนำกลางบ้าน บ้านหลวงพ่อเลี้ยงเป็ด เลี้ยงไก่ เลี้ยงตัวหมา ตัวหมู...บ้านญาพ่อ แต่เฮาว่าขี้เป็ดขี้ไก่มันเหม็น ขี้หมูขี้หมามันเหม็น แต่มันอยู่กลางทางเฮา ไปเหยียบเอา ไปเหยียบเอาแล้วเฮ็ดจังใด๋ ล้างบัดเนี่ยะ แน่ะ...ล้างออกเพราะมันเหม็นเด๊ะบัดเนี่ยะ ล้างแล้วไปเหยียบอีกตื่ม เว้าเป็นอย่างนั้น เขาว่าคนอวดดีซือๆ ว่าขี้เป็ดขี้ไก่มันเหม็น ทำไมจึงไปเหยียบมัน มันบ่เห็นเด๊ะ ยังจะไปเหยียบแม่นบ่ อันบ่เห็นเด๊ะ มันยังโกรธนั่นก็ได้ ว่าซื่อๆ เด๊อันนี้น่ะ

จึงว่าไปนั่งสงบอยู่ สงบอยู่ผู้เดียวเด๊ วั้นบาดไป เขามาว่าให้แอนแตงไปเลย (หัวเราะเบาๆ) บ้านหลวงพ่อเรียกแอนแตง หมากแตงนี่ผ่าเอาในมัน แอนแตงว่าซั่น บ้านหลวงพ่อว่า เฮาผ่าหมากแตง ผ่าแล้วไปเฮ็ดเป็นกลีบแล้วกาบมันงอขึ้น เขาเรียกว่าแอนแตง...บ้านหลวงพ่อ เป็นอย่างซั่น สู้บ่ได้เลย อันนี้แท้...อ๊อย...บ่ต้องว่าแล้ว เหอะ… คู่ต่อสู้มาก็ชกมันโลดบัดเดียว บ่ต้องไหว้ครูแล้ว เรื่องเป็นแชมเปี้ยนบ่ยากจักน้อย ว่าซั่นหลวงพ่อว่านี่ หลวงพ่อฮู้จักอย่างซั่น

ดังนั้น การเจริญวิปัสสนาจึงว่า บ่ได้เหมือนกันกับสมถกรรมฐาน บ่ได้เหมือนกันแท้ๆ เหมือนกันกะว่าได้ บ่เหมือนกันกะว่าได้ มันสมมุติว่า ถ้าว่าเหมือนกันนั้น มัน..นี่มันสงบ อันความสงบนั้น ความเดียวกันนั่นแหละ แต่มันสงบคนละอย่างกัน อันนึงสงบน้ำแข็ง อันนึงสงบน้ำลึก ให้เข้าใจอย่างซั่น อันนึงสงบอยู่ในถ้ำ อันนึงสงบออกนอกถ้ำ เอ้า…ว่าอย่างซั่นก็ได้ อันนึงสงบอยู่ในมุ้ง อันนึงสงบออกนอกมุ้ง ว่าซั่นก็ได้ ครั้นอยู่ในมุ้งแล้วยุงบ่ไปกัด ครั้นออกนอกมุ้งมาแล้วยุงกัด เพิ่นว่าอย่างซั่น จึงว่า เฮาอยู่ในถ้ำ เฮาจิไปเห็นรูปทรงของถ้ำบ่ บ่เห็นแล้ว ของมันมืดเด๊ เฮาอยู่ในมุ้ง เฮาก็บ่เห็นรูปทรงของมุ้ง เฮาบ่ได้ออกนอกมุ้งมานี่

ตอนที่หลวงพ่อเข้าใจตัวนี้ ตอนเช้า...ว่าให้ฟัง เดี๋ยวจะหาว่าญาพ่ออวดดี พูดอวดอุตริมนุสสาธรรม คือ ธรรมอันยิ่งของมนุษย์ บ่มีในตน ต้องอาบัติปาราชิกขาดจากภิกษุ-ว่าซั่น ว่าก็ตามซ่างแล้ว..ความเว้าแม่นบ๊อ ในนวโกวาทเรียกว่าพูดความจริงนี้เพิ่นว่า พูดอุตริ(อุด-ตะ-ริ)ว่าซั่น บ่แม่นอวดเด๊ะ พูดอุตริมนุสสาธรรมคือธรรมอันยิ่งของมนุษย์ที่มีในตนต่ออนุปสัมบัน ต้องปาจิตตีย์ - ว่าซั่นเพิ่นว่า

ครั้นของจริงมีก็เว้าแล้ว จิว่าจังใด๋ บ่แม่นอวดดีหยังวะ คนอวดดีเว้านั้นเป็นแท้ๆ เป็นแท้ๆ เด๊ะ เพราะว่าบ่ฮู้จักเน้ะ อันนี้เฮาฮู้จักอยู่ว่า มันจิเป็นหยัง ก็เป็นซั่นวะ เพราะเว้าให้คนฟัง ของมันคว่ำหน้าอยู่ว่ะ บ่ไปหงายขึ้น ไผจิฮู้จักจักเทื่อ มันก็หงายขึ้นให้คนเห็นซั่นวะ จึงจิเว้าได้ คืออย่างญาพ่อว่านี่ ครั้นบ่ว่า ไผจิว่า ก็ต้องว่าตี๊บัดเนี่ยะ

จังว่า แหวนรถ กับน็อตรถน่ะ มีแต่หันเข้า มันจิออกจักเทื่อบ่ ? ก็มายออกจักเทื่อเด้แม้ เกลียวมันอัดแน่นอยู่นี่ก็มายซ้ายก็บิดออก บิดออก ก็ตกโกกเป๊กออกซั่นวะ มีเรื่องอย่างใด๋ อันนี้มีแต่หันเข้า หันเข้า มีแต่ทำบุญ ตายแล้วยังเอาสวรรค์ ตายแล้วยังเอานิพพาน เอ๊า!....ตายแล้วมันจิเอามาเฮ็ดหยัง คนตายแล้วมันจิฮู้จักมิหยัง

ทำบุญหลายๆ เพิ่นว่าบัดเนี่ยะ ทำบุญหลายๆไว้ ชาติหน้ายังเอา เพิ่นว่า ลองบ่เชื่อญาพ่อ เฮ็ดทดลองก็ได้นี่นะ มื้อนี้แต่งอาหารไว้ จักห้ามื้อยังไปกินเบิ่งดู อาหารมันจิเป็นจังใด๋ เอ้า…ว่าเบิ่งดูกินอาหาร แต่งไว้จักห้ามื้อแล้วไปกิน สบายมั้ย (ผู้ฟังตอบ-ไม่สบายครับ) มันเป็นหยัง (ตอบ-มันบูดครับ) มันบูดแน่ะ! เฮาก็ต้องมีปัญญาอย่างซั่นแมะ...คนน่ะ จังว่าคนต้องมีปัญญา แต่งมื้อนี้ ต้องกินมื้อนี้ตี๊ จิเอาไว้ฮอดมื้อหน้ามื้อไหนเฮ็ดหยัง ทำบุญมื้อนี้ ก็ต้องเอามื้อนี้ตี้

ที่ญาพ่อว่าให้ฟังเนี่ยะ ว่าด้วยความจริงใจ ตอนเช้า ญาพ่อย่างไป คล้ายๆ คือมัน..ผ้านี่หลุดออกเมิ้ด แต่หากบ่หลุดเด๊ - ผ้า มันสมมุติว่าซือๆ คล้ายๆ คือถอดเสื้อออก ถอดกางเกงออก เบา....ตัวเย็น...ไปอย่างซั่นละ โอ๊....เป็นอย่างซี่เด๊ เรื่องความบ่มีตนบ่มีตัวนี่นะ แต่หากมีตัวอยู่เด๊ะ ญาพ่อย่างอยู่เด๊ มีตัว ฮู้อยู่ว่าซั่น เห็นอยู่ว่าซั่น อ๊อ.....แม้.....มีเงินจักพันล้านนี่ซื้อได้บ่.....บ่ได้ว่าซั่น

เรียนหนังสือมากๆ จบพระไตรปิฏกแล้วรู้บ๊อ...บ่รู้ ญาพ่อว่าอย่างซั่นบัดนี่ อ้อ...ความรู้อันนี้เพราะหยัง ? รู้เพราะรู้สึกตัวนี่เอง ความรู้สึกตัวนี้จึงมีอานิสงส์มาก ความรู้สึกตัวนี้จึงมีอานิสงส์มาก ซื้อบ่ได้ขายบ่ได้ อย่างเฮาพริบตาอยู่นี่ คนอื่นจิฮู้จักนำเฮาบ๊อ ? เห็นเฮาพริบตาซื่อๆ แต่ความรู้สึก บ่มีไผฮู้

บัดนี้ ใจเฮาคิดอยู่เนี่ยะ คนอื่นก็มองบ่เห็น เฮาก็มองบ่เห็น ทำไมเฮาจึงบ่ฮู้ ? เฮาต้องฮู้ติ๊ ใจเฮาคิดอ่ะ มันคิดหยังต้องฮู้ติ๊ หลวงพ่อเลยเข้าใจ อ้อ.....ความไปก็บ่มี ความมาก็บ่มี เพราะมันขาดแล้ว มันขาดออกจากกันซื่อๆ นี่นะ พอดีขาดออกจากกันก็...เอาเชือกไนล่อน หรือยางก็ได้ มัดใส่เสานี้กับเสานั้นน่ะ ตึง....เคร่ง แล้วตัดปั๊บ มันก็มา...ขาดมันก็มาอยู่กับเสานี้ พี้แม่นบ่ เสานั้นขาดไป มันก็อยู่เสานั้นบ๊อ ตัดตรงกลางแล้วนี่ ดึงหากันก็บ่ถึงแล้วบัดนี่ ทำอิดมันถึงกันอยู่บัดนี่ เฮาตัดปุ๊บนึง ตัดขาดแล้ว มันก็หดย้าว...ไปโลด มันขาดออกจากกันแล้ว

แต่เพิ่นว่าเอายกมาไว้อายตนะสิบสอง ในตำราเพิ่นว่า ตาเห็น อย่าฮู้จักว่ามันสวยมันงาม โย้......มันมีกิเลสอยู่ มันก็สวยก็งามซั่นว่า จิว่าอย่างใด๋ ว่าซือๆ นี่นะ ญาพ่อเคยได้ยินเน่..พระหนุ่มเณรน้อย ครั้นเบิ่งผู้แม่ออกมาจังหันมาเพลนี่ เอ๊า...อายตนะตาเห็นอย่าให้มันงาม แล้วมันหากลักงามอยู่พู่นล่ะว้า ใจมันงามอยู่พู่นเด๊ มันเป็นอย่างซั่นเด๊ จังว่าตาเห็น-ว่าซั่น...รูป อย่าฮู้จักว่ารูปหญิงรูปชายรูปสวยรูปงาม อย่าฮู้จักฮั่น มันทนบ่ได้ เพิ่นเอิ้นยางเหนียว เพิ่นเอิ้นกิเลส นั่นน่ะ เพิ่นว่าซั่น

บัดนี้ มาเฮ็ดอย่างซี่แล้ว อ้อ....ความจริงเด๊มันมีแล้วในคน เฮาหากบ่ฮู้จักซื่อๆ จึงว่า มันมีในคนทุกคน บ่ยกเว้น จะเป็นพระสงฆ์องค์เณรก็ปฏิบัติอันเดียวนี้ เป็นญาติเป็นโยมก็ปฏิบัติอันเดียวเท่านี้ เป็นคนถือศาสนาใดก็ตามซ่าง ฝรั่ง อังกฤษ จะว่าอย่างใดก็ตามซ่างและ คนญวนคนลาว มีศาสนา บ่มีศาสนาก็ตามซ่าง เฮาจิมาปฏิบัติบ่ให้มันทุกข์เกิดขึ้นนี่นะ

ถ้าทุกข์บ่เกิดขึ้นแล้วเป็นหยัง โย้...ก็บ่เป็นหยังก็ตามซ่างแล้ว จิว่าอย่างใด๋ มันบ่ทุกข์แล้วก็แล้วแล้ว ไปทำการทำงานโดยบ่ขุ่นมัวนี่นะ ญาพ่อฮู้จัก มีคนมาเว้าให้ญาพ่อฟัง เรียนหนังสือ จบปริญญาโทมาจากอเมริกา มาทำงานในธนาคาร ทำได้หกเดือนเท่านั้นล่ะเว้ย ญาพ่อมาอยู่ที่วัดสนามในนี่แล้วนะ ไปทะเลาะกับหมู่ ก็บ่ได้ทะเลาะดอก หมู่ว่าเรื่องนั้นเรื่องนี้ ก็เป็นบ้าไป นี่แหละบ่ฮู้จักจิตใจตัวเองง่ะ มันคิดไปสับสนวุ่นวาย คิดไปเมิ้ด เพิ่นว่ายุ่งหมดว่าซั่น ผู้พี่ชายกับผู้พ่อเอามาหาญาพ่อ ญาพ่อก็ว่าให้ฟัง บ้าอย่างใด๋ ไปคิดนำเขาอย่างใด๋ เขาเว้าพอเขาเนี่ยะ เขาบ่ได้ว่าให้ตัวเอง ตัวเองไปซิ่งไปซอมเขา หาว่าเขาว่าให้ตัว ตัวไปคิดบ้าๆ บอๆ ผู้เดียว ก็เป็นบ้าซั่นนั้นวะ มาบวชนำญาพ่อสิบกว่ามื้อพู้นวะ เดี๋ยวนี้เซา เดี๋ยวนี้ไปทำงานธนาคารอีกตื่มแล้ว เดี๋ยวเนี่ยะ เอาเงินมาให้ญาพ่อว่ะ อีตานั้น พิมพ์หนังสือ หนัง...หนังสือคิริมานนท์ สมัยนั้นพิมพ์หนังสือคิริมานนท์ กับด็อกเตอร์กำจรเนี่ยะพิมพ์ซ่อย(ช่วย) หนังสือคิริมานนท์คุณกำจร ด็อกเตอร์กำจรนี่พิมพ์ แล้วญาพ่อก็พิมพ์ เราเอาเงินมาซ่อย(ช่วย) เราทำงานในธนาคารเขา

นี่แหละ คนบ่ฮู้จัก เป็นบ้าเพราะความคิดตัวเอง คนเป็นบ้าบ่แม่นอื่นไกลล่ะ คิด...ความคิดมันบ่ฮู้จักหยุด เพิ่นว่าหยุดบ่เป็น เซาบ่เป็น มันก็คิด........ (หลวงพ่อลากเสียงยาว) ไปสับสนวุ่นวาย คิดอันนั้นมาติด คิดอันนี้มาต่อ คิด......แล้วคิด คิด........แล้วคิด กินบ่ได้ นอนบ่ได้ คิด..........แล้วคิดอยู่นั่น สมองมันยุ่งขึ้นมา เอิ้นว่าสับสนวุ่นวาย เพิ่นว่าอย่างซั่น ความคิดสับสนวุ่นวาย อันนั้นน่ะ อย่าไปเข้ามัน อันนั้นแหละ พระพุทธเจ้าว่าให้พระวักกลิกว่า อย่ามาอยู่นี่พระวักกลิก - หนี ว่าซั่น หนีจากความคิดสับสนวุ่นวายพู่นเด๊ะ บ่แม่นจิย่างหนีกะโต๊ยๆ ไปคือเฮาย่างหนีนี่เด๊ะ บ่แม่นอย่างซั่นเด๊ะ เฮาไปเข้าใจว่าย่างหนีไปกะโจ๊ยๆ ไปว่าซั่น เอา...อันนั้นก็แม่นนั้นก็ได้

พระพุทธเจ้าบอกว่าความคิดมันสับสนวุ่นวาย มันเป็นทุกข์ พระวักกลิก ครั้นพระวักกลิกหนีจากความคิดอันนั้นแล้ว บ่ให้มันปรุงมันแต่ง แล้วก็เห็นพระพุทธเจ้าแหละว่าซั่น แน่ะ! เฮาอยู่นี่ก็จิเห็นแล้วเดี๋ยวนี้นี่ บ่ได้คิดหยัง.... ฟังญาพ่อว่านี่สบายอยู่นี่แหละ พระพุทธเจ้าน้อยๆ ซะก่อนเกิดขึ้นน่ะ นี่แหละอย่าไปหาพระพุทธเจ้าในประเทศอินเดียพู่น ว่าเพิ่นตรัสรู้ต้นโพธิ์ เอ๊า...ไปเอามาเฮ็ดหยัง ใบโพธิ์อันนั้น ตรัสรู้ต้นโพธิ์ต้นนี้เนี่ยะ เฮาว่ากันอยู่เรื่อยๆ อันบ้านญาพ่อว่าเนี่ยะ คนแต่งงานกันเอาผัวเอาเมีย-บ้านญาพ่อ ไปหาผู้เฒ่าผู้แก่ไป ไปสู่ขวัญให้มัดข้อต่อแขน ไปเป็นต้นโพธิ์โตฮ่มให้ลูกให้หลานแด้-ซิน่านซิเพิ่นว่า แต่บ่ฮู้จักว่าต้นโพธิ์โตร่มอยู่ไส ต้นโพธิ์คือตัวเฮาเนี่ยะ โตฮ่มคือตัวเฮานี่แหละ ถ้าหากเฮาไปอยู่กับต้นไม้ มันมีใบ...มันมีใบไม้ มันก็บ่ฮ้อน ครั้นไปอาศัยไม้แก่นล่อนล่ะ ระวังให้มันดี ใบบ่มี ง่ามมันกะโดกมันจิหล่นใส่หัว เนี่ย..ให้เข้าใจอย่างซั่น

ไม้แก่นล่อนคือหยัง โย้...คนบ่มีคุณธรรม คนบ่มีธรรมะ ครั้นไปอยู่ใกล้มัน มันจิด่าเฮา บึดเดียวมันจิตีเฮา มันจิเอารัดเอาเปรียบเฮาเท่าใด บ่ฮู้จักเด๊ะคนอย่างซั่น คนบ่มีคุณธรรมเพิ่นว่าเอารัดเอาเปรียบกับสังคมเพิ่นว่าจังซั่น คนผู้ที่มีคุณธรรมเห็นว่าเขาคือเรา เราคือเขา

พระพุทธเจ้าจึงคือคนธรรมดา เป็นเมิ้ดทุกคน แต่เฮาหากบ่ได้เอาพระพุทธเจ้ามาไว้กับเฮา เฮานั้นไปเอาใบโพธิ์พระพุทธเจ้าตรัสรู้พู่น บ่อนเพิ่นนิพพานพู่น บ่อนเพิ่นเกิดพู่น ไปไว้อยู่พู่น อั๊น.....ไปไว้ตัว..เฮานี่เบิ่งนี่เป็นหยัง เฮาเกิดมื้อใด๋ วันใด๋ ปีใด๋ ไปไหว้รูปพระพุทธเจ้าเกิดบ่อนฮั่น ตรัสรู้บ่อนฮั่น ตายบ่อน.... ไปซื่อๆ นี่เสียเงินเสียทองซ้ำ-บางคนนะ บางคนบ่มี ได้ไปยืมเขาก็มีเด๊ะบางคน

ญาพ่อเคยได้ยินเด๊ คนไปทำงานซาอุเนี่ยะ นี่..ญาพ่อได้ยินขเจ้าว่า บ่มีเงิน-อยากไป เอาไฮ่เอานาไปจำนำจำนองขเจ้า ได้ไปซาอุแล้วได้เงินเดือนแล้วจิเอามาให้ จิเอามาแก้ทุกข์นั่นแหละ ผลที่สุดทุกข์ซ้ำ นาก็เหมิดซ้ำ - เน่....นั่นแหละเพิ่นว่าบ่เข้าใจ เห็นเขาเฮ็ดแล้วเฮ็ด เห็นเขาทำแล้วทำ อย่าเชื่อถือโดยเห็นเขาทำตามกันมา เพิ่นบอกแล้ว อย่าเชื่อถือโดยเห็นว่ามันมีอยู่ในตำรา เพิ่นบอกไว้แล้ว เราก็ไปเชื่ออย่างซั่น อันนั้นแหละเพิ่นว่าอย่าเชื่อ ต้องใช้เหตุใช้ผลพิจารณาหาของจริง

เมื่อเราได้ของจริงแล้ว เราจะเอาแต่ของจริงนี้มาว่า ทำงานมากๆ ก็จิมาแก้ทุกข์นี่ ได้เงินเดือนหลายๆ ก็จิมาแก้ทุกข์นี่ เฮียนหนังสือได้ด็อกเตอร์จักสิบด็อกเตอร์ก็จะมาแก้ทุกข์นี่ ถ้าแก้ทุกข์บ่ได้แล้ว บ่มีค่ามิหยังเท่าใดด๊อก เรียนปริญญาเอก ด็อกเตอร์นั้นก็ได้ มีเงินจักพันล้านนั้นก็บ่มีค่ามิหยัง.... ครั้นจิว่าแรงๆ ก็สู้ตัวแมวบ่ได้ก็ว่าละ ตัวหมาบ่ได้ก็จิว่าซั่นใดก็ได้ละ หมาแมวมันนอนสบายอยู่ อันนี้มีเงินพันล้านร้อยล้านพู่นนะ ยังทุกข์อยู่นี่นะ มันจิมีประโยชน์มิหยัง สมควรมาเกิดเป็นคนบ๊อ มันบ่สมควรมาเกิดเป็นคนล่ะ พูดจังซั่น แน่ะ..เพิ่นว่าอย่างซั่น

จึงว่า มีเงินเอามาก่อกำแพงของเฮาให้มันได้ เอาเงินมาก่อกำแพงจังใด๋ว่าซั่น โย้...เจ้าบ่มีหยัง ข้อยจิซ่อย แน่ะ..เอาเงินให้เขา เขาก็ทำงานให้เฮาว่าซั่น ให้บ่อยๆ นี่ มาทำงานให้เฮาบ่อยๆ บัดนี่ ผลที่สุด เฮาก็เลยบ่ได้เฮ็ดงาน ผู้ฮั้นจิมาทำงานซ่อยเฮา มีผู้ใดจิมาฆ่ามาตีเฮา “เขาจิมาฆ่าเจ้าเด๊ะ! ” เขาจิมาบอกเฮาซ้ำ

อันนี้แหละ เงินมันใช้ประโยชน์ได้ง่ายๆ มันเป็นกำแพงของเฮา-เงินนี่ ถ้าหากบ่มีแล้ว ไปขอเพิ่นกินก็บ่ได้อีกตื่มละ ครั้นเจ็บไข้ได้ป่วยมา ไปโรงพยาบาล หมอบ่เอาใจใส่เด๊ะ-ครั้นบ่มีเงิน เดี๋ยวนี้ยิ่งแล้วเด๊ะเดี๋ยวนี้ คนใดมีเงินตัดคิวเมิ้ด (หัวเราะเบาๆ) มันเป็นอย่างซั่นเด๊ะ คนใดมีเงิน หมอฮู้จักโลด ทำปุ๊บปั๊บ ตรวจให้โลด เป็นอย่างซั่น จังหวะให้รู้จักหา ให้รู้จักเก็บ ให้รู้จักใช้ บ่รู้จักหาบัดเนี่ยะ รู้จักแต่ใช้ บ่รู้จักเก็บ ได้มาเท่าใดก็ใช้ไปเมิ้ด ญาพ่อถามขเจ้าเนะ บางคนมีเงินเดือนสามพันสี่พัน บ่มีเงินจั๊กบาทก็มี บางคนเงินเดือนสองพันสามพัน มีเงินฝากธนาคารก็มี

บ้านหลวงพ่อ- เป็นตำรวจ เงินเดือนสิบสองบาท เก็บไว้เงิน..เงินเดือนสิบสองบาท เก็บไว้จนได้เงินเป็นพัน บัดนี้นายผู้เงินเดือนพัน ได้ไปยืมเงินผู้เงินเดือนสิบสองบาทก็มี อันนี้แสดงว่าเก็บสตางค์เดียวบ่เป็น ร้อยบาทก็เก็บบ่เป็น มีร้อยบาทบัดเนี่ยะ เก็บบ่เป็น หมื่นนึงก็เก็บบ่เป็น มีหมื่นบาทบัดเนี่ยะ เก็บหมื่นนึงบ่เป็น แสนนึงมันสิเก็บเป็นบ๊อ มันต้องเก็บตั้งแต่สตางค์เดียวพี่นี้ไป

อันเฮาเฮ็ดอยู่นี้ก็คือกัน มันต้องรู้น้อยๆ ซะก่อน มันจึงรู้มากขึ้น มากขึ้น มากขึ้น จนถึงที่สุดได้ เงินก็คือกัน เฮาต้องเก็บสตางค์เดียวเป็นก่อน เก็บสตางค์หนึ่งเป็น สองสตางค์ เก็บได้ถึงสิบบาท เก็บร้อยบาท เก็บพันบาท หมื่นบาท แสนบาท ผลที่สุดเขาจะเอิ้นว่า เอ๊ว...อีตานี่มีเงินหลายเนาะ จิเอิ้นเศรษฐีน้อยก็ได้ มันเป็นอย่างซั่นเด๊ะ อันนี้แหละจึงว่าบริษัทจริงๆ หมายถึงว่าผู้ใดมาซื้อ เอาให้โลด อันนี้แหละคนมีบุญ จิเอาบุญให้หมู่ได้ คนบ่มีบุญให้อ่ะ มันจิเอาบุญให้หมู่เป็นบ่, มันต้องมีบุญซะก่อน จังว่า ทุกสิ่งทุกอย่าง เฮาต้องทดลองซะก่อน ก่อนจิไปสอนผู้อื่น หมู่เพิ่นมานี่ก็คือกันเด๊ะ อย่าคร้านเด๊ะ ครั้นคร้าน-ญาพ่อก็บ่ว่าหยังให้ บ่ใช่จิผิดกฏหมาย บ่เฮ็ดอย่างซั่น บ่เฮ็ดก็บ่ได้เฮ็ดแล้ว ไผจิว่าหยังให้ หากบ่ฮู้แล้วว่ะ จิมาเอามื้อเอายามซื่อๆ นี่บ่

เห็นญาพ่อว่าปฏิบัติให้ติดต่อกันสามปีเหมือนลูกโซ่เนี่ยะ ต้องลด...ลดความทุกข์นี่ มาอยู่ฮอดสิบปีก็ได้แล้ว บ่ยกไม้ยกมือจักเทื่อ บ่เบิ่งจิตเบิ่งใจจักเทื่อ อยู่ฮอดร้อยปีก็ตามซ่างแหละ บ่มีประโยชน์-อันนั้น มาอยู่มื้อเดียวก็ตามซ่าง ถ้าหากฟังแล้ว ตั้งอกตั้งใจ เข้าอกเข้าใจ ก็ใช้ได้โลด เพิ่นว่าอย่างซั่นเนะ

อันนี้ก็เลยจิว่าอาการเกิด-ดับ ให้ฟังโลด เพราะว่า มาฮอดนี้ก็ต้องว่าอาการเกิด-ดับนี้ล่ะ คนเกิดมาร้อยปีว่าซั่น หากบ่รู้ชีวิตจิตใจตัวเองเกิด-ดับ บ่รู้จักสภาพภาวะอาการจิตใจเกิด-ดับนั้น ชีวิตของผู้ฮั้นเป็นหมันเป็นโมฆะ บ่มีประโยชน์เป็นหยัง...เพิ้นว่าอย่างซั่น คนเกิดมามื้อเดียวบัดเนี่ยะ รู้จักสภาพชีวิตเกิด-ดับภาวะของจิตใจเกิด-ดับว่า-ซั่น รู้จักสภาพอาการเกิด-ดับว่าซั่น คนเกิดมามื้อเดียวนี้มีชีวิตอยู่เป็นอยู่ดีกว่าคนเกิดมาอายุเป็นอยู่ร้อยปี คนเกิดมามื้อเดียวมันจิพลิกคิงติงโตได้บ๊อ? ญาพ่อเบิ่งอยู่แล้ว คนเกิดลูกออกมาแล้ว มันไห้ ออแง้ว..ออเเง้วอยู่ฮั่นผู้เดียวมัน พลิกคิงก็บ่ได้นะ จิกินน้ำก็บ่เป็นนะ (ขอ) อนุญาตเต๊อะ ขี้ก็นอนขี้อยู่ฮั่นนะ เยี่ยวก็นอนเยี่ยว มันจิฟังหยังเป็น

อันหมู่เฮามานี่แหละ เว้าคือจิซ่างว่าให้ฟังหมู่นี้ เว้าซือๆ อันมาฟังมื้อเดียวนี่ สามารถฮู้จักโลดนี่เพิ่นว่าเกิดมามื้อเดียว เพิ่นว่า ดีกว่าอันอยู่มาตั้งแต่..เกิดมาตั้งแต่น้อยๆ เพิ่นว่า เพิ่นว่าอย่างซั่น บัดนี้บวชมาร้อยพรรษาก็ตามซ่าง ถ้าหากบ่รู้ว่าซั่น สภาพภาวะอาการเกิด-ดับ การบวชผู้ฮั่นน่ะ ชีวิตในผ้าเหลืองน่ะ เป็นโมฆะ เป็นหมัน เปล่าว่าซั่นน่ะ เป็นหมันเปล่าพู่นน่ะ สู้ผู้บวชมื้อเดียวบ่ได้ ผู้บวชมื้อเดียวนี่รู้จักสภาพภาวะอาการเกิด-ดับอันนั้น เพิ่นว่าดีกว่า มีประโยชน์กว่าคนที่บวชมาร้อยปี เพิ่นว่าอย่างซั่น ให้เฮาเข้าใจจริงๆ

พุทธศาสนานี่ พ่อญาพ่อว่าให้ฟัง ญาพ่อไปนอนนากับพ่อญาพ่อ ศาสนาได้ห้าพันปีว่าซั่นเพิ่นว่า จิมืดตึ๊บ เทวดาจิมาบังแสงตะเว็น บ่ให้เห็น ไปไสมาไสบ่ได้เจ็ดมื้อเจ็ดคืน บ่ได้กินข้าวบ่ได้กินน้ำ เพราะว่าบ่จักทางไปเด๊-มืด บัดนี้ให้ได้เจ็ดมื้อเจ็ดคืนแล้ว จิมีเทวดาองค์หนึ่งมาเปิดโลกว่าซั่นเพิ่นว่า ก่อนเทวดาจิเปิดโลกนั้น พระพุทธรูปอิฐหินดินปูนก็ตามซ่าง พระไม้พระเงินพระทองก็ตามซ่างเพิ่นว่า จิเหาะไปรวมไว้บ่อนเดียวโลด พอดีเหาะไปแล้ว ไฟธาตุไหม้เมิ้ดว่าซั่น อันหมู่เป็นอิฐหินดินปูน เป็นพระทองพระแก้วพระไม้นั้น ไฟไหม้เป็นฝุ่นไปเมิ้ดว่าซั่น ดวงจิตวิญญาณที่ไปอยู่กับพระพุทธรูปนั้น ท่อกับเม็ดงานี้เพิ่นว่า จิมารวมตัวกันเข้า รวมตัวกันเข้า เป็นรูปเจ้าชายสิทธัตถะกุมาร เป็นพระพุทธเจ้าเทศน์แสดงธรรมเจ็ดมื้อเจ็ดคืนว่าซั่น ผู้ใดได้ไปฟังธรรมะความฮั่นแล้ว ผู้มีปัญญามากจิได้เป็นพระอรหันต์ว่าซั่น พ่อว่าให้ฟังอันนี้

ผู้ที่มีปัญญาน้อยลงมาก็จะได้เป็นพระอนาคามี ผู้ที่มีปัญญาน้อยลงมาจิได้เป็นพระสกิทาคา ผู้ที่มีปัญญาน้อยลงมาจิเป็นพระโสดา ผู้ที่มีปัญญาน้อยลงมาจิเป็นมนุษย์ ผู้ที่ปัญญายังแน่นหนาก็เป็นคนธรรมดานี่แหละ อันพระพุทธรูปอันนั้นไปบ่ได้ แท้ๆ เหาะบ่ได้แท้ๆ ญาพ่อรับรอง มันจิเหาะได้จังใด๋-พระพุทธรูปอ่ะ อันตัวคนนี่แหละ บ่แม่นเหาะดอก ย่างมา หมู่แม่ออกอยู่นี่ อยู่ทางใดฮุญาพ่อบ่ฮู้จัก อยู่โคราชก็มี แม่นบ่แม่ออกมานี่ฮึ (มีเสียงผู้ฟังตอบ ฟังไม่ชัด) มี อยู่โคราชก็บ่แม่นเหาะมาเด๊ะ ขึ้นรถมาแม่นบ๊อ แน่ะ! อยู่กรุงเทพนั้นก็บ่แม่นเหาะมา นั่งรถมานี่

พระสงฆ์องค์เจ้าก็คือกันนี่ เพิ่นว่าเพิ่นจิเปิดอบรมวิปัสสนาเด๊ะซั่น ไปฟัง แล้วเข้าใจที่ว่าซื่อๆ นี่แหละ อย่าไปเชื่อว่าเพิ่นเป็นพระพุทธรูปเเท้ๆ อันตัวจิตใจสะอาด สว่าง สงบ จิตใจบริสุทธิ์ผ่องแผ้ว มีในเฮานี้ เฮาจิฮู้จักน้อยๆ ซะก่อน เพิ่นว่าอย่างซั่น จึงว่าเท่ากับเม็ดงานี้ จิตใจพระพุทธเจ้าอยู่กับตัวเฮาเนี่ยะ เพิ่นเอิ้นว่าอยู่กับพระพุทธรูป รูปตัวเฮานี่แหละจิเป็นพระขึ้นมาแท้ๆ

ญาพ่อย่างอยู่ ญาพ่อเป็นโยม ญาพ่อฮู้จักว่าญาพ่อเป็นพระยังวะ นุ่งกางเกงขาสั้นหรือขายาวฮุ ญาพ่อก็จำบ่ค่อยได้ดี ผมยาวอยู่ โอ๊....กูเป็นพระได้แล้วเด๊ ว่าซั่นญาพ่อว่า แน่ะ! เว้าเอาเองเด๊ะเนี่ยะ บ่มีผู้อื่นเว้าให้ ไผสิว่าก็ตามซ่าง บ่ว่าก็ตาม ญาพ่อเป็นพระมาแต่มื้อนั้นจนเท่ามื้อนี้ล่ะ บวชก็เป็นอย่างซั่น บ่บวชก็เป็นอย่างซั่น

ที่เพิ่นว่า เข้าสู่สภาพของมันแล้ว ว่าซั่นเพิ่นว่า รู้จักถึงที่สุดแล้ว ญาณย่อมมีเพิ่นว่า รู้จักว่าสิ้นชาติสิ้นภพ เพราะมันขาดออกจากกันเท่านั้นแหละ เมื่อมันขาดออกจากกันแล้วก็มันบ่ไปต่อกันได้ เพิ่นว่า คนที่มีกิเลสแล้ว ตายต้องเกิดอีกตื่ม เพิ่นว่า คนที่หมดกิเลสแล้ว ตายก็บ่เกิดอีกตื่ม เพิ่นว่าอย่างซั่น ให้เฮาฮู้จักคำพูดแต่ละคำเนี่ยะ พระพุทธเจ้าตัดผมครั้งเดียว-ว่าซั่น ยาวค่าสองข้อมือนี่แล้ว บ่ยาวต่อไปอีกตื่มว่าซั่น ผมอยู่หัวพู่น มันก็ต้องยาวตื่มติ๊ อันตัวธรรมชาติของมันแท้ๆ เนี่ยะ มันขาดแล้ว มันสะบั้นไปแล้ว มันจืดไปแล้ว มันบ่ยาว เพิ่นว่าอย่างซั่น ที่มันขาดออกจากกันแล้ว

เพิ่นนะว่า ตาเห็นอย่าให้มีรูปสวยรูปงาม หูฟังอย่าให้มีม่วนมีบ่ม่วน เพิ่นว่าแท้อายตนะสิบสอง ตา หู จมูก ลิ้น กาย ใจ เป็นอายตนะภายใน รูป เสียง กลิ่น รส สัมผัส ธรรมารมณ์ เป็นอายตนะภายนอก เพิ่นว่าอย่าให้มันสืบเนื่องกัน เพิ่นว่า, มันสืบ ถ้าหากว่าเฮาเฮ็ดอันนี้แล้ว มันบ่สืบแท้ๆ ถ้าทำจริงๆ มันบ่สืบแท้ๆ บ่แม่นจิรอคอยมิหยัง ยังว่า ตำราเพิ่นบอกไว้ ผู้ที่เจริญสติปัฏฐานสี่อย่างถูกต้อง-ว่าซั่น ให้ติดต่อกันเหมือนลูกโซ่-ว่าซั่น อย่างนานเจ็ดปี อย่างกลางเจ็ดเดือน อย่างเร็วนับตั้งแต่หนึ่งวันถึงเจ็ดวัน มีอานิสงส์สองประการเพิ่นว่า หนึ่งเป็นพระอรหันต์ในปัจจุบันชาตินี้-ว่าซั่น สองถ้าหากบ่ได้เป็นพระอรหันต์ ต้องเป็นพระอนาคามีแน่นอนที่สุด-เพิ่นว่า

อันนี้ ญาพ่อก็เลยว่า บ่ต้องเอาเจ็ดปีอันนี้ เอ้า...เอาสามปี ทำเบิ่งดู-ว่าซั่น ทุกข์มันจิลดน้อยไป ทำสามปีติดต่อกันเหมือนลูกโซ่นี่ เอ้า..ทุกข์ต้องลดน้อยไปแท้ๆ บ่มากก็น้อย อย่างนานนะ อย่างกลางปีนึง อย่างเร็วที่สุดเอาตั้งแต่สามเดือน-เก้าสิบมื้อลองเบิ่ง อันนี้ครั้นบอกให้ฮอด..ฮอดเก้าสิบมื้อก็เฮ็ดบ่ได้แล้ว-คนกรุงเทพแม่นบ๊อ มันเงินน้ำเงินเดือนเด้ มันรัดตัวเด้ ไปทำการทำงานน่ะ มามื้อแลง มื้อเช้าไปกะได้ คุณกำจรมาอยู่กับญาพ่อนี่เด๊ะ เราทำงานอยู่โรงเรียนมหิดล โอ๊..โรงเรียนแม่นบ๊อเนาะ มหาวิทยลัยมหิดลเนี่ยะ สองทุ่มมา ตีห้าออกไปโลด โอ๊...นานละมาอยู่เนี่ยะ เป็นเดือนพู่นเด๊ะ เราก็เข้าใจคือกัน แต่ได้เฮ็ดน้อย แต่ว่าไปทำงาน เพราะว่าครั้นบ่ไปทำงาน ก็บ่ได้เงินเดือน เงินเดือนนั้นเอามาซื้อกินแล้วอย่าให้มันมีทุกข์ขึ้น

เลยเห็นความคิด เข้าใจความคิดว่า โอ้..ความทุกข์บ่แม่นผู้อื่นเฮ็ดให้เรา เราเองเป็นคนทำ คนอื่นนั้นจิว่าก็อย่าขเจ้าแล้ว ว่าเจ้าบ่ดีก็ว่าอย่าขเจ้าล่ะวะ เฮาทำดีแล้ว คนทำดีซื่อๆ นี่เด๊ะ แล้วคนทำดี อยากให้คนอื่นว่าดีให้บัดเนี่ยะ เอ๊า...ว่าดีบ่ว่าดีก็ตามซ่างว่ะ ทำงานต่อหน้าที่ของเราซื่อๆ นี่นะ ทำงานเพื่องานซื่อๆ เนี่ยะ งานประเทศชาติบ้านเมืองทุกคนเกิดมาต้องทำงาน

ญาพ่อจึงว่า พ่อให้รู้จักหน้าที่ของพ่อ แม่ให้รู้จักหน้าที่ของแม่ ลูกให้รู้จักหน้าที่ของลูก ครูบาอาจารย์ให้รู้จักหน้าที่ของครูบาอาจารย์ ผู้ใหญ่บ้าน กำนัน ตำรวจ ทหาร ต้องรู้จักหน้าที่ เมื่อทุกคนรู้จักหน้าที่ เคารพนับถือหน้าที่ตัวเองแล้ว บ้านเมืองก็สงบขึ้น มีเรื่องมิหยัง ก็เป็นนิพพานน้อยๆ ขึ้นมา ซั่นวะมีเรื่องอย่างใด๋ เพิ่นว่า อันนี้เฮาบ่ได้เฮ็ดอย่างซั่น

ที่ญาพ่อว่าให้ฟังมื้อนี้ก็เห็นว่าสมควรแล้ว เว้าให้ฟังมื้อเช้าก็เว้า มื้อแลงก็ว่า แต่ว่าอย่าคร้าน อย่าคร้านแท้ๆ ให้เฮ็ดจังหวะ เดินจงกรม ถ้ามันง่วงนอนก็ฮีบลุกโลด ญาพ่อจิสาธิตเฮ็ดจังหวะแก้ง่วงนอนให้เบิ่งมื้อเนี้ยะ ถ้าหากว่าบ่เฮ็ดจังหวะมันสู้มันบ่ได้ เปลี่ยนอิริยาบถทันที

เอาแหละ ที่ญาพ่อได้นำธรรมะมาเล่าสู่ฟังในวันนี้ก็เห็นว่าสมควรแก่เวลาแล้ว ท้ายที่สุดนี้ อาตมาพร้อมด้วยพระสงฆ์และญาติโยมมานั่งฟังธรรมะอยู่ ณ สถานที่นี้ อาตมาขออ้างอิงเอาคุณของพระพุทธเจ้า และพระธรรมคำสั่งสอนขององค์สมเด็จพระสัมมาสัมพุทธเจ้า และคุณของพระอรหันตาสาวกพระสัมมาสัมพุทธเจ้า มาเตือนจิตสะกิดใจของพวกเรา ให้พวกเราได้รู้แจ้งเห็นจริงตามความเป็นจริง อย่างที่พระพุทธเจ้าว่านั้น ว่าให้ฟังสองบท สามบท มื้อเนี่ยะว่า

สัตว์ทั้งหลายคือเราตถาคตว่าซั่น สัตว์ทั้งหลายเหมือนเราตถาคต สัตว์ทั้งหลายเป็นพระตถาคตว่าซั่น ฟังเข้าใจ-บางคน บางคนก็บ่เข้าใจ คำว่า สัตว์ทั้งหลายคือเราตถาคตนี้คือบ่อนใด? ว่าซั่น มันเข้าใจสองคำบัดนี่ ครั้นบ่ฮู้ก็คือกันนั่นแล้วกับผู้บ่ฮู้อันนั้น บัดนี้ครั้นว่าทางฮู้ คือกันอย่างใด๋ ก็มีแข้งมีขา มีมือมีเท้าเท่ากันกับพระตถาคต สัตว์ทั้งหลายเหมือนกันว่าซั่น เหมือนกัน เฮ็ดแล้วก็ฮู้เหมือนกัน ครั้นบ่เฮ็ดเหมือนกันก็บ่ฮู้เหมือนกัน สัตว์ทั้งหลายเป็นตถาคตว่าซั่น บ่แม่นสัตว์เดรัจฉาน สัตว์มนุษย์นี้เอง เป็นพระตถาคต ก็บ่แม่นรูปนี้เป็น ใจมันเป็นคือว่าให้พระวักกลิกนั้นแหละ

ขอให้เราทุกคนจงประสบพบเห็นเอาจิตใจสะอาด จิตใจสว่าง จิตใจสงบ จิตใจบริสุทธิ์ บ่โงกเง่า..เอ้อ..บ่โงกเหงา บ่เศร้าซึม ให้จิตใจผ่องแผ้วสะอาด สว่างไสว ว่องไว ตัดสินใจลงไปปึ๊บ… ถูกโลดบัดเนี่ยะ ขอให้เราทุกคนจงประสบพบเห็นเอาในเวลาอันใกล้นี้ จงทุกๆ คน เทอญ.